中環出更：好餸食唔停 黃祥漢返次鄉下肥3斤
有時人在他方，久唔久都會掛住自己生活地方嘅美食，卓妮早兩日喺新界潮人總會舉辦嘅晚宴上見到香港蔬菜同業聯會會長黃祥漢，佢話返到鄉下就唔得了，會放縱自己不停食，次次都捧住個大肚腩返香港，就最近嗰次返咗幾日鄉下，最少肥咗三斤返嚟。嘩！咁就要努力減肥喇！
問到有冇思念家鄉美食，黃祥漢就話一定有，即使自己住喺香港，一有時間都會煮家鄉餸回味吓，最拿手就係反沙芋，雖然冇爸爸整得咁好食，但經過自己不斷嘗試之下已達八成味道。
莊健成父女鍾情奶茶魚蛋粉
轉頭見到新界潮人總會主席莊健成同佢囡囡莊翠珊，莊健成話咁多年慣咗朝早飲奶茶食個菠蘿包，有時去到外國做嘢，都會喺香港買定即沖奶茶去飲，試過朝早冇飲奶茶落肚，個人好似囉囉攣好唔舒服。莊翠珊就話自己最鍾意食就係魚蛋粉同埋爹哋煮嘅家鄉菜，佢話爹哋整大眼雞同埋煮番薯粥好好食，後尾要去英國讀書，成日都好掛住啲美食，想去買食材自己煮，但嗰邊好難搵到，後尾都係煮白粥算數，仲話當然冇爸爸煮得咁好食，但都好過冇啦！
陳恒鑌不時為妻兒煮住家菜
博愛醫院董事局永遠顧問彭少衍同立法會議員陳恒鑌（Ben）都有嚟撐場。阿Ben話早前個胃有啲問題，依家好番晒就成日諗住食嘢，每次一諗即刻諗起打冷，自己周不時都喺屋企整番兩味拿手小菜，最鍾意整「半煎煮魚」，食到屋企人個個都舔舔脷，仲話最近同老婆仔女返鄉下，同佢哋試吓家鄉菜，一試之下老婆竟然愛上「胡椒豬肚湯」，仔女就鍾意飲「西臚蓮藕湯」，仲話係佢最近最有成功感嘅事。
卓妮