身形同地位一樣咁有分量嘅立法會金融服務界議員張華峰（肥老闆），近來喺立法會開會時，睇落分量再加重，肚腩都明顯大咗。問及肥老闆，佢都承認近日肚腩肥咗啲，笑指食得太多嘢，運動又冇咩增加過，雖然冇上磅，但自己都感覺到肥咗，肚腩增長都帶來好多困擾，西裝褸都變得窄窄哋，但自己都唔理啦，民以食為天，鍾意食得嘅就食。雖然食得是福，但都要注意健康呀！
