政情：梁栢賢周圍旅行 網友叫佢做節目主持
早前見到醫院管理局前行政總裁梁栢賢（PY）去咗東京玩，近日佢又去咗潮汕「搵食」喎，有網友直情叫佢去做旅遊節目主持人添！咦！變身藝人？唔通十年前嘅「預言」成真？
十年前曾遭認錯做藝人
PY日前喺Facebook上貼文，話去咗高鐵三日兩夜潮汕遊，美食盡品嘗！仲上載咗九款當地美食，令人睇到流晒口水。貼文出街之後，第一個留言嘅網友就係藝人兼歌手馬浚偉，仲話嗰度係佢鄉下。可能好耐冇見PY喺公眾場合出現，有網友就話佢睇起嚟瘦咗，亦有網友話戴咗黑超嘅PY好似周潤發（發哥），更有網友直情話PY可以做旅遊節目主持人，介紹一下美食美景。
做節目主持？唔奇吖，事關早喺十年前有人已經認錯PY係藝人。點解？話說佢上任冇耐，有朝出街，撞見一對賣旗嘅母子，媽媽覺得PY好熟面口，但就叫唔出PY個名，跟住竟然指住PY同囝囝講，「佢梗係藝人嚟嘞，叫藝人叔叔喇！」搞到PY啼笑皆非，但證明佢有明星相。
咪睇佢平時咁嚴肅，其實好搞鬼，例如每年喺醫管局研討大會嘅致詞都玩嘢，曾試過大玩cosplay，化身寵物小精靈中嘅小智，向大家講解醫管局資訊科技最新發展，又完美示範key圖，將自己個樣key落全家福，變成「全家PY」，引來全場爆笑。綜合呢啲元素，佢做節目主持應該冇難度喇！