政情：勿羨原居民丁權 劉啟康嘆有苦自己知
香港土地問題嚴重，上樓係唔少人嘅奢望，搞到唔少人羨慕原居民有丁權，成年有得起丁屋，就可以有瓦遮頭。不過，坑口鄉事委員會主席劉啟康竟然話，原居民有自己嘅壓力喎，到底係咩呢？
常被標籤為鄉下人
劉啟康話，坊間對原居民有唔少標籤，好似佢十二歲嘅兒子同朋友講住村屋之後，就即刻被人話佢係鄉下人。佢就話唔反感被人叫鄉下人，但就感受到其他家長會為原居民再貼其他標籤，如政治取態咁喇。
佢又透露，聽過有年輕人唔敢認自己係原居民，而且呢個情況唔關近期社會氣氛事，呢件事竟然已經存在了十幾年，真係估唔到原居民呢個身份，喺城市人眼中覺得有特權，但有人會覺得係包袱喎。難怪作為八十後鄉頭嘅劉啟康都話，希望能夠慢慢培養番年輕人對圍村歸屬感啦。
另外，劉啟康又提到，外界講起原居民時會聯想到丁權、「太公分豬肉」等，但只知概念而非實際情況，好似唔少原居民住緊殘破不堪嘅村屋，甚至前身為豬欄嘅寮屋，大嘆原居民嘅辛酸唔係所有人都知囉。