中環出更：忙裏偷閒 鄧宣宏雁10號波都要去睇戲
工作繁忙有時偷啲時間出嚟睇番場戲，都係唔錯嘅選擇，保良局總理鄧宣宏雁同杭州香港青年會創會會長沈慧林（William）早前出席一個電影放映會活動，鄧太講起佢同老公都好鍾意睇戲，拍拖嗰陣都成日入戲院，仲大爆老公話呢個係最平嘅消費，所以依家一有時間就會搵場戲睇吓，甚至十號風球都出去睇添！風雨下外出睇戲，都幾浪漫吖！
講起鍾意睇咩類型嘅電影，鄧太就冇特別講係邊一類型鍾意，只係講唔鍾意睇鬼片，佢話，鍾意戲院裏面嘅環境，音響又夠晒震撼，可以專心享受一部電影喎。
沈慧林鍾意睇正能量電影
至於William就話自己鍾意睇啲正能量、邪不能勝正嘅戲，工作繁忙時，睇場戲可以減吓壓，平日有同老婆或者朋友一齊去睇，但係有啲戲唔係個個人都啱睇，要搵啱「戲腳」，而且有時收工夜麻麻，一個人入戲院睇，都係一種享受。
珠寶設計師莊莎娜（Sarah）同家姐莊菲娜都有出席放映會，莊菲娜就話，同老公香港中華總商會副會長楊華勇，自拍拖開始已經成日去睇戲，有時見到套戲啱自己睇，連飯都唔食睇咗先，兩公婆睇戲睇到已經好合拍，今次自己揀完，下次就輪到老公揀，依家有埋小朋友仲多一個選擇，可以睇卡通片添，一家人去睇戲享受家庭樂，認真開心。
莊莎娜：睇戲攞到設計靈感
至於Sarah就鍾意睇動作片同科幻片，最鍾意戲院裏面嘅氣氛，睇戲可以減壓之餘，仲可以攞到設計靈感，就算喺屋企好多時都會睇吓戲、放鬆吓自己，佢講開入場睇戲有件必做嘅事，就係買汽水同爆谷，買完就可以坐定定，全情投入去睇。
卓妮