政情：聽錯月餅票做閱兵票 黃傑龍遇「黃牛」得啖笑

男子口音惹誤會

黃傑龍尋日喺Facebook 貼文講，話喺黃大仙廟門口行過，遇到一個講嘢口音比較重嘅男人行過嚟，問：「我有閱兵票，你要唔要？」黃傑龍心諗「你咁勁？咁都賣到黃牛？」於是就問對方：「兩張坐天安門主席台嘅票幾錢？」可能都好期待對方攞啲乜嘢出嚟，但佢話對方就喺袋裏面攞咗一堆月餅票出嚟。

原來係月餅券，唔係閱兵票，唔係炒黃牛，嗰位男士亦唔係黃牛黨，真係得啖笑。而黃傑龍都話「講嘢講清楚啲嘛！」唔知佢係咪因為捉唔到黃牛黨而失望呢？之但係中秋節都過晒喇，點解呢位男士仲要兜售月餅券呢？又真係幾離奇喎。

有網友就喺Facebook留言，話黃傑龍呢次經歷真係笑死，另有網友都話月餅都過晒期喇，亦有網友話「仲月餅票？出年o架？」