政情：梁美芬論身份認同 惹火遭圍攻
近排通識教育被指教壞細路，扭曲年輕人對自己嘅身份認同感。立法會議員梁美芬尋日出席一個論壇講及身份認同嘅問題時，點知遭到「上下夾攻」，被台上嘉賓發言「圍攻」之餘，同時被場外人士破口大罵，下半場時間學生哥仲要追問佢送仔女去外國讀書點樣增加中國身份認同感，成場討論都「聲疊聲」，由討論變成罵戰。
指先認中國籍至有特區護照
可能因為身份認同呢個議題好惹火，所以論壇一開波就充滿火藥味。話說泛民主派立法會議員話年輕人對中國嘅自豪感同認同感本身就低，問到「就算冇國民教育，係唔係通識教育變中國歷史，就真係可以洗腦？」梁美芬就回應話係中小學教材出問題，先至令年輕人身份認同感、對國家自豪感下降，所謂嘅通識科係「冇教材任人講」。佢認為香港人係先承認中國籍，先會有特區護照，畢竟特區護照全稱係「中華人民共和國香港特別行政區」，同時需要誠心誠意尊重祖國行事同管理，唔應該用違法行為表達訴求，話音未落就引來台下觀眾大鬧「賣港賊」！
接住發言嘅香港大學學生會前會長孫曉嵐就話需要公義，對住梁美芬講「好多議員代表唔到香港人，我哋需要雙普選」，梁美芬就話根據《基本法》，係可以循序漸進爭取，但並唔係好似年輕人咁諗，即時全部實現。孫曉嵐即插嘴打斷梁美芬，並追問「咁你支唔支持普選？」最後你一言我一語，「聲疊聲」咁嘈咗上嚟，變咗激烈討論，台下市民亦都鬧埋一份。
泛民話建制左搖右擺無作用
冇耐，泛民議員又話「建制派左搖右擺」，講講吓梁美芬啱啱想回應，再次被泛民議員話「畀我講埋先好嘛，你講咗兩三round啦，你講嘢嗰時我都冇插嘴」頂番轉頭。
到現場觀眾提問環節，連台下中學生都寸梁美芬，「請問梁美芬議員你啲仔女送去外國讀書點樣增加對中國嘅認同感呀？」以及「其實香港係咪要參考外國教育制度？」梁美芬就淨係答「我哋唔應該否定自己係中國人，唔應該攬炒」，點知泛民議員又一句頂埋去話「係你哋建制派帶香港人攬炒，好似政府咁扮對話，實質做戲，希望建制派可以發揮吓作用啦！」