政情：觀塘噴泉惹議審批完又提擱置 建制反枱區會流會

由於會議最後一項議程係動議修例引起嘅爭議要求成立獨立調查委員會調查，所以旁聽席差唔多爆滿。當會上有議員討論港鐵服務安排，期間民主黨區議員莫建成鬧港鐵上月二十四日封站對居民造成不便，影響佢哋出入，但另一議員張順華就幫港鐵護航，話相信港鐵有豐富知識同經過審慎考慮先會作出相關決定。

拗咗一輪，去到動議要求擱置音樂噴泉工程嘅議程嗰陣，民建聯嘅陳國華就對有關動議大感不滿，話唔明點解有議員喺工程獲得足夠票數贊成，同時已經過審批嘅情況下動議擱置，怒斥「將市民啲公帑攞嚟玩」，又表明講完嘢就走人，多名建制派議員見狀拉隊離場，主席陳振彬就宣布休會十五分鐘。

隨即有部分喺旁聽席嘅市民離場，但近十個民主黨同公民黨成員就喺休會期間展示印上「五大訴求，缺一不可」、「徹查警暴，成立獨立調查委員會，濫用私刑可恥」字句嘅紙牌，高叫「止警暴，制黑亂」等口號抗議。最後由於會議唔夠法定人數開會，陳振彬宣布流會，就連要求動議修例引發爭議要求成立獨立調查委員會調查嘅議程都傾唔到。

噴泉造價5000萬 財會通過撥款

翻查資料，音樂噴泉呢個造價約五千萬元嘅社區重點項目惹起好大爭議，自一五年起，三度向立法會工務小組闖關，及後亦幾經波折，喺舊年十一月底獲立法會財務委員會通過撥款。

蔡澤鴻：不滿動議 可提出修正

有份提出擱置工程嘅區議員蔡澤鴻就話，如果有議員不滿，可以提出修正，甚至反對，認為唔應該用離場嘅方式表達，加上上次大會無討論工程，如果尋日再唔將佢列入議程嘅範圍，項目最終只會不了了之，自己亦都唔可以同市民交代細節。

對於要求成立獨立調查委員會調查嘅議程未能討論，蔡澤鴻批評有人以呢個方式導致流會，唔單止會令觀塘區議會蒙上污點，相關議員亦唔能夠向選民負責。