眾所周知，勞工及福利局局長羅致光曾經多次反對重推N無津貼，不過，近日財政司司長陳茂波表明邀請關愛基金考慮重設N無津貼，搞到羅致光都冇得再推。聽講，政府初步建議以二○一六年津貼金額按通脹率增加一成，以訂出今次嘅津貼金額，例如一人住戶將增至四千四百元，二人住戶就增至八千八百元。講真嗰句，依家基層上樓咁難，劏房租金咁貴，社會怨氣咁大，政府庫房又咁多錢，早就應該重設N無津貼啦，依家跌得少少出嚟，都唔知夠唔夠幫啲基層家庭呀！
