政情：保監局新任命又見舊面孔 熱廚房鬧人才荒
香港依家社會氣氛緊張，火頭處處，要幫政府撲火真係談何容易。呢個「熱廚房」愈嚟愈難頂，唔知係咪因而鬧人才荒，尋日公布保險業監管局（保監局）嘅任命又有舊面孔上榜喇！
政府尋日公布委任三人出任保監局非執行董事，三人中就有上年年尾先獲政府委任為香港浸會大學校董會主席嘅陳鎮仁，一年兩度獲委任公職，而佢對擔任新公職並唔陌生，以前已經做過職業訓練局主席。
其實近年嘅公職任命經常翻炒舊人或者搵前高官做，更曾經出現打破政府不成文嘅「六六規定」，即係同時只可身兼六個委員會同六年任期，你話唔係鬧人才荒都無人信囉！
出稿寫錯字 新聞處又甩轆
另外，上月尾先換咗新人掌管嘅新聞處又再甩轆，今次出稿介紹陳鎮仁時，就將職業訓練局寫成「職業訓業局」，咁嘅表現真係無眼睇喇！