政情:大晒球技無分政黨 葉文斌蘇炤成一齊扮跳波

雖然話運動係無分年齡嘅,但係年近八旬嘅屯門區議員蘇炤成竟然仲同後生仔鬥波,真係估佢唔到。

話說一班屯門區議員尋日去參觀屯門兆麟政府綜合大樓,蘇炤成就同另一位區議員葉文斌喺籃球場中圈上有所動作,好似好牙煙喎。不過佢哋只係作狀扮跳波,但蘇炤成仍然跳得相當高,睇嚟身手好唔錯。

葉文斌笑住話,同蘇炤成分別喺交通及運輸委員會做正副主席而有所合作,知道對方好玩得,所以去到籃球場時諗住整蠱對方,邀請一齊扮跳波,認真貪玩。

氣氛融洽 笑指體育救港

另外,大樓內仲有乒乓波枱,葉文斌話大家見到之後立即返老還童,仲不分黨派輪住打波,氣氛好融洽喎,難怪佢笑指可以用體育救港喇!如果社會嘅對立氣氛都可以咁易搞番掂,就真係一天都光晒喇!

第一手消息請下載on.cc東網iPhone/iPad/Android/Windows Phone Apps