政情：製造矛盾扮苦房屋短缺扮盲 石禮謙堅離地出口術阻收地
近日社會熱議政府會否增加引用《收回土地條例》，以解決土地房屋嚴重不足嘅問題。建制派之一、立法會地產及建造界議員石禮謙尋日喺電台節目時就表明反對，認為《收回土地條例》係政府民望低到谷底先做嘅事，形容做法係「打地產商」，製造矛盾。建制泛民議員表明不認同石禮謙嘅講法，建制派劉國勳認為依家公營房屋短缺，有需要引用此條例去增加供應，至於泛民尹兆堅亦指，土地短缺、樓價租金高企係社會上嘅廣泛共識，而且目前細節未定，有關條例可能對地產商有利，批評石誤導市民咁話。
香港土地房屋短缺問題持續多年，外界一直有聲音要求採用《收回土地條例》增加土地供應，不過政府過往一直憂慮引用有關條例會引來漫長司法覆核。但最近建制派多次高調建議，引用《收回土地條例》覓地建公營房屋，有聲音認為呢個係政府有意轉軚嘅迹象。
劉國勳：引用相關條例非新鮮事
石禮謙喺節目中提到，自己雖然係建制派，但如果政府做唔合理嘅事都盲目支持，結果就會同《逃犯條例》修訂一樣，暗指會引起社會上好大回響。佢又指，政府目前民望低迷，喺呢個時間上推動《收回土地條例》，只係想令到市民覺得政府「有作為」，可惜手段係「打地產商」，認為係製造予盾，仲大鬧政府冇令地產市道同環境可以配合市民住屋需要，只係一心諗住幫市民買樓，直言運輸及房屋局局長陳帆要因此辭職咁話。
劉國勳指出，明白石禮謙有其觀點，但引用有關條例作公眾用途並非新事物，呢啲收回嘅土地亦唔係用嚟起私樓，依家基層困苦，公營房屋相當不足，相信地產商都會希望香港社會安定，認為政府應該加大力度，用已有嘅方法去增加供應，解決房屋問題就係香港社會嘅最大共識，願意令石了解多啲咁話。
尹兆堅斥講啲唔講啲 誤導市民
尹兆堅就認為，《收回土地條例》並唔會好似《逃犯條例》修訂咁引起社會上極大回響，事關土地短缺、樓價租金高企係社會上嘅廣泛共識，並不如《逃犯條例》修訂咁大爭議。佢仲質疑石禮謙「講啲唔講啲」，扮受害者誤導市民，指出目前地產商囤積咗約二千公頃農地，若政府採用《收回土地條例》可以令呢啲農地變成住宅，加上收地都會賺到唔少錢，地產商有可能係最後得益者。尹補充話，呢啲情況有冇可能發生，就要睇政府點安排啲細節喇。
講真嗰句，依家基層生活咁艱苦，隨時住都冇得住，加上社會怨氣咁大，就算石禮謙係功能界別議員，如果只係諗住地產商利益，而唔去諗點解令到大家安居樂業，咁就當然會搞到各界都鬧爆啦！