中環出更：義工執屋奇遇陳振彬 搵到條發霉鹹魚
「助人為快樂之本」，無論用任何形式去幫人都係一件開心事嚟嘅，好多鍾意做義工嘅人都會遇到難忘事，好似觀塘區議會主席陳振彬尋日出席「齊清潔，愛香港」啟動禮時講起，每逢過年前做義工就最忙，皆因佢要幫啲老友記手執屋，最深刻嘅係有次喺一個婆婆屋企執屋，搵到啲放咗好耐嘅鹹魚，拎上手發覺原來發晒霉添！嘩，咁誇張？
陳振彬話，之後都有教番婆婆，要攞啲鹹魚出去露台曬，咁先會保存得耐啲。佢又話，老友記儲儲埋埋好多雜物，平時又冇乜丟嘢，搞到佢要搵社工上門協助，勸喻一大輪，啲長者先會丟咁啲唔等使嘅嘢，不過過程都要好小心，因為有啲具紀念價值嘅嘢，老友記會當係寶o架！
沈豪傑話巡視鼠患勾起童年陰影
講起做義工，元朗區議會主席沈豪傑就形容區議員嘅工作都同做義工好似，例如不時會去老人院探吓啲老友記，又講起早排巡視區內嘅衞生黑點，其實自己都好驚老鼠o架，但係又要睇吓鼠患情況，發現朝早就冇乜老鼠，但夜晚收工嘅時間就有好多，亦令佢勾起兒時回憶，就係細個同屋企人去大牌檔食飯，食食吓飯有隻老鼠係地下經過，嚇到佢全程要戙高對腳，周不時望住地下有冇老鼠，搞到成餐飯都無晒食欲。
轉個頭又見到立法會議員陳凱欣，佢就講起，試過開街站，都見到垃圾桶附近有好多紙皮，於是叫助理、義工一齊幫手執，執執吓就儲咗一大堆紙皮，之後轉贈畀啲公公婆婆拎去賣，一來等佢哋有少少收入，二嚟可以令環境衞生啲，平時都會教一對仔女將街上嘅垃圾丟落垃圾桶，希望由細培養佢哋有良好嘅習慣咁話。
卓妮