政情：乞求美國干預港務 民主阿婆被轟無恥

中央早前狠批民主阿婆、有漢奸黎之稱嘅壹傳媒黎智英、民主黨（白鴿黨）創黨主席李柱銘（李漢奸）同前主席何俊仁（AV仁）係「禍港四人組」，佢哋經常攪局，又四出唱衰香港，而民主阿婆同李漢奸更不時乞求美國干預香港事務。

實際上，美國國會將會討論有關法案，日前港府就話對於美方介入香港事務表示絕不認同同埋深切遺憾，仲話唔容許外國成為香港事務嘅持份者，但係呢個舊電池、冇晒政治光環嘅民主阿婆竟然大放厥詞。

民主阿婆尋日喺記者會回應記者提問時，鬧爆話港府容唔容許美國政府去討論法案，又話依家事實擺在眼前，香港作為國際金融服務中心，美方喺香港有大量國民同投資喎。佢仲解釋，話因為香港同內地政府有唔同制度，所以美方先答應香港有特殊待遇，仲話如果香港逐漸變成一國一制時，美國就有權檢討係咪畀香港有特殊待遇。

掉轉槍頭 當自己美國代言人

呢個港府前高官竟然掉轉槍頭，當正自己係美國代言人咁款，佢仲話港府同內地政府屢次強調貫徹落實一國兩制，認為如果係可以說服到國際間嘅話，港府同內地政府又有乜嘢要驚喎。跟住又指指點點，話港府委任前高官余黎青萍同前大律師公會主席林定國入監警會，對佢哋嘅立場存疑。

評論員斥搵藉口 一唱一和攪局

時事評論員陳雲生狠批民主阿婆嘅表現係非常無恥，仲話佢講到自己咁公義，但本身都有好多問題未解決。佢仲話喺香港嘅歷史入面，冇一件事同美國有關，而民主阿婆作為前高官，竟然對香港嘅歷史都搞唔清楚，覺得好可笑。佢又話好多國家都喺香港有做投資，但人地唔會好似美國咁干涉香港內政，批評民主阿婆依家係搵藉口，同美國一唱一和做番啲嘢喎。