政情：八網難逃：陸頌雄落邨整燈籠 手工唔叻搵援兵
中秋節就嚟到啦，唔少家長都會買燈籠畀小朋友玩，有人落士多買，亦有人選擇親手整。立法會議員陸頌雄（Michael）尋日落屋邨同街坊、小朋友一齊DIY整燈籠，但佢自嘲手工唔叻，所以搵咗一班義工幫手。
嘆社會風氣差 憂嘈交冇團圓
Michael話今次整燈籠活動主要係想推廣親子活動，本來覺得唔會咁多人參加，點知到最後材料都唔夠用呀！佢話雖然自己手工唔叻，但都落手落腳整咗個擺喺辦事處，仲話會買啲材料返屋企同囝囝一齊整，激發吓囝囝嘅藝術細胞咁話喎。
被問到中秋節會點過？Michael就話中秋正日會同屋企人食個飯，之後會搵番日同幾個朋友嘅家庭聚一聚，畀啲小朋友玩吓。但同時佢都嘆晒氣，話最近社會氣氛咁差，中秋節唔知有幾多家庭會因為意見不合而嘈交，搞到冇得團圓，所以佢勸大家要多啲聆聽互相之間嘅意見，希望每個家庭當日都可以人月兩團圓。