政情：沈運龍愛幫襯老街坊粥店
有「中東王子」之稱嘅香港珠寶製造業廠商會榮譽主席沈運龍（Aaron），近日喺Facebook上載咗幾張相，原來佢去咗何文田愛民邨嘅粥店食「平民餐」。點解呢？原來Aaron同呢間粥店嘅老闆李松慶（慶叔）已經識咗好多年，兩個人係老街坊，所以佢時不時都會落去幫襯吓，仲大讚好好味添！
Aaron話近排出咗本新書，主要都係講番自己喺中東嘅經歷，希望藉此鼓勵年輕人踏出香港，嘗試出國見識一下，尋找新嘅機遇。喺社交平台可以見到兩個人嘅合照，Aaron喺其中一本書上面寫咗「慶叔」兩個字，而李松慶仲笑得好開心。
新書擺喺店供免費借閱
慶叔今次係託朋友向沈運龍買咗十本書，擺喺粥店免費畀人借閱，希望幫到年輕人，佢有時仲會派愛心粥畀有需要嘅老人家，近排仲買咗架的士接送行動唔方便嘅人添！