政情：鍾志平憂山竹重臨 岑智明：機會唔大
舊年香港遭到超強颱風山竹吹襲，對社會帶來嚴重破壞，令到唔少平時打風只顧玩樂嘅香港人終於感受到大自然嘅威力。職業訓練局主席鍾志平尋日就有機會去天文台參觀，亦都把握機會問天文台台長岑智明相關問題喇！
仍要睇兩三星期發展
岑智明上載參觀照片到Facebook，透露鍾志平問山竹會唔會喺今年重臨，岑智明即場對佢大派定心丸，直言目前機會唔大，但仲要睇未來兩三個星期嘅發展喎。咁講法即係仲有變數，真係要多留意天文台消息先穩陣。
另外，鍾志平似乎對氣象好有興趣，竟然問到風切變同颱風歷史，而岑智明亦都非常熟書，分享七一年颱風露絲，連一九○六年嘅丙午風災都講埋，相信今次鍾志平同埋一班職訓局學生、員工都獲益良多喇！