中環出更：工作家庭難兼顧 李阮錦鑾：忙到帶埋囡囡去見客
做雙職女性唔容易，好似中華廠商聯合會婦女委員會現任主席李阮錦鑾話，女士要兼顧工作同家庭係好難，好似佢以前就做裝修貿易嘅，雖然結婚之後都有繼續堅持事業，但囡囡出世後，有段時間仲要帶埋個女一齊見客添！
香港中華廠商聯合會婦女委員會創立二十五周年，尋日公布嚟緊會有各類唔同嘅慶祝活動。李阮錦鑾就分享咗做雙職女性嘅困難，佢仲話去到後期直情放棄咗事業，因為佢覺得作為女人「都係以家庭為重」，又話媽咪係屋企嘅「靈魂」冇咗真係唔得，都希望香港倣效吓外國，發展「home office」幫吓現時嘅女士，等佢哋唔好咁辛苦。
曾邱菊香：為省時間搬屋到廠附近
婦委會副康樂主任曾邱菊香就話廿幾年前同丈夫發展食品廠，事業啱啱起步各方面都未穩定，一對仔女又細，為咗方便照顧佢哋，於是將屋企由將軍澳搬到柴灣廠房附近，節省來回時間，又請工人姐姐照顧，自己亦會早起幫手準備早餐、校服，星期日陪佢哋玩吓，暑假去吓旅行咁，雖然嗰陣係好辛苦，好彩都苦盡甘來，仔女已經大個，可以獨當一面嘞。
至於婦女會首任暨榮譽主席陳小玲就話，委員會九十年代創立時幾乎冇人參與，好彩之後重辦工展會，先愈嚟愈多人關注，講起自己以前發展事業，同時點樣兼顧家庭？佢笑住話自己風格係口講唔理，其實趁仔女瞓晒，佢就偷偷爬起身檢查功課等，到依家照顧個孫都係咁，絕對唔寵得咁話喎。
佢又話有次同一班大學生會面，在場大多都係獨生仔女，但佢估唔到，有學生竟埋怨父母奪去佢哋嘅獨立權，所以話小朋友唔寵得，要放手畀空間佢哋自己慢慢成長。
卓妮