政情：公民講場：研重推租置 維修最棘手 陳帆被警告咪卸膊

人人都想有瓦遮頭，唔想做無殼蝸牛，而最新一項調查結果話約九成受訪者支持重推租者置其屋計劃，七成半會考慮購買現居單位。老實講，政府淨係講話冇地起樓，公屋又嚴重短缺，若果重推租置計劃，咁部分公屋戶變咗業主就會安心好多，但係租置最大嘅問題係維修，有立法會議員已經警告運輸及房屋局局長陳帆咪卸膊，若果要紓減市民對上唔到樓嘅怒火，唔該陳帆快啲諗吓點解決。