政情：寫信籲業主減一半租金 姚思榮為旅遊業救亡
反修例嘅激烈行動持續咗三個月，重創香港經濟，旅客大幅下跌，生意好難做、嗌晒救命，立法會旅遊界議員姚思榮呢排頻頻撲撲為業界救亡，尋日就喺社交平台貼文，話若果業界有需要搵佢寫信，呼籲業主減租。
姚思榮話喺近呢幾個月，因為示威衝突持續，訪港旅客明顯下跌，出境旅遊消費亦呈下跌趨勢，預計跌勢會進一步擴大，由於唔少向佢反映生意額大跌，經營出現困難，希望佢幫忙發信呼籲業主減租，共度時艱，所以佢就喺社交平台通知業界，有需要就搵佢嘞！
冀政府推措施幫手
咁減幾多呢？佢話會幫啲業界，尤其係喺商場舖嘅業界，寫信呼籲業主將租金減半，為期半年。佢仲話航空公司都講過出境旅遊都大受打擊，喺電話回應話希望政府都出番啲政策同貸款幫幫手。
其實，佢之前搵咗香港旅遊業議會出外旅遊委員會傾偈，希望快啲制訂到短期方案救急，搞番掂「插水式」下跌嘅旅遊業咁話。