政情：政府齋撥款唔加權 任葆琳嘆區議會難起作用
南區區議會今午舉行今屆會期最後一次嘅會議，有「哈佛小甜甜」之稱嘅區議員任葆琳喺會議上提出討論提升區議會職能，直指立法會區議會功能界別議員劉國勳喺一六年曾動議強化區議會角色同職能，有關議案獲得通過，但政府只針對喺撥款方面，區議員執行職能上並唔係有太大的權力。
任葆琳認為要落實地區行政主導，若果區議會地區事務上角色可以得到更大權力，對地區事務發展同監測工程進行嘅幫助好大，佢以所屬嘅香港仔選區為例，南寧街天橋升降機工程開展近三年仍未完成，當局半年前更加隱瞞竣工日期，到近排不停打電話去三催四請，先發現工程仲未可以喺限期內完成，而因為區議員無法定權力，令到佢想畀意見同監控都唔得，呢個亦都係佢想區議會有更多權力，發揮職能幫助處理社區民生事項嘅原因。
資源撥外訪 事後冇討論經驗
有民主派議員認為必須要檢討區議會工作成效，又話政府撥區議會外訪嘅資源，但議員去完外訪，有關嘅外訪經驗喺區議會冇討論，故日後商討外訪時必須要考慮效用。另一名區議員則強調必須加強區議會諮詢職能，若果冇配套嘅話，好多做唔到。