政情：滿街塗鴉 歐陽鳳盈高松傑自發洗街
《逃犯條例》修訂風波引起嘅示威衝突蔓延至全港各區，所以唔少地方都曾經被示威者貼上標語或噴上塗鴉，香港島婦女聯會副秘書長歐陽鳳盈、菁英會副秘書長高松傑等見狀，就聯同幾個好友組織義工隊去清潔，早前已經去過深水埗、旺角，最近一次去咗灣仔，歐陽鳳盈接受查詢時話嚟緊仲會繼續去清潔，目標係感動各區街坊一齊做。
唔會清理連儂牆
歐陽鳳盈話初初只係連同幾個好友一齊做，後嚟愈嚟愈多人加入，至今義工隊已有二十幾人，仲有啲無法參加嘅朋友會提供膠手套等物資，以示支持。佢仲話，佢哋唔會清理示威者表達訴求嘅「連儂牆」，只會清理其他位置嘅標語同塗鴉，每次都只會清一個鐘頭，清得幾多得幾多咁話。
咁清理標語有冇引起示威者不滿？佢話暫時冇試過畀人鬧或阻止，反而讚嘅就有，但其實清潔都唔係咁順利，佢話有啲塗鴉噴咗落石罅入面，咁就好難清喇！