中環出更：劉江華遭當面鬧青年工作離地

民建聯尋日搞咗個新界西座談會，邀請咗劉江華出席。立法會議員周浩鼎、陳恒鑌同梁志祥喺會後話有五十人參加座談會，入面有當區區議員、老師、社區幹事同居民，議題包括咗大廈管理、文康設施、土地未善用同青年問題。

梁志祥話有市民對文康設施不足好唔滿意。好似喺元朗嘅東頭村咁，附近起咗新嘅私樓，多咗啲年輕夫婦同家庭入住，但係東頭遊樂場就得足球同籃球場，冇兒童遊樂設施，咁叫小朋友點玩先得o架！仲有教育問題，有與會人士就鬧政府青年工作唔貼地。好似通識科咁，就有老師反映有啲問題好偏頗，搞到學生好難答。

梁志祥話劉今個月會落區

為咗加強溝通，特首前日先話司局長要走入社區，點解劉江華出席呢個座談會要閉門呢？唔通唔敢面對公眾？班議員就解畫，話座談會與之前喺九龍東同九龍西屬同一個系列，一早約好晒，所以都係閉門喎。不過，梁志祥就話劉江華今個月內會落區，雖然落區形式未決定。究竟劉江華會兌現承諾抑或放市民飛機？大家一於拭目以待嘞！

卓妮