喺連場反修例嘅激烈衝突下，訪港遊客大幅下跌，連帶旅遊、零售同食肆嘅生意都大受打擊，多個旅遊業工會尋日出嚟請願，話業界面臨十級地震，要求政府為業界提供出路，而飲食業亦受到重創，好多都即將結業。老實講，依家經濟唔好，再係咁落去，失業率必定上升，但佢哋嗌咗咁耐，商務及經濟發展局局長邱騰華同勞工及福利局局長羅致光都冇乜實際行動去幫佢哋出手，唔係仲喺度等運到，唔理打工仔嘅飯碗呀？
