政情：今日你上鏡：囝囝初返學 徐曉杰怕佢似自己搵媽媽
暑假已經去到尾聲，已經有學生哥開始返學，相信唔少父母都可以鬆番口氣，唔使再煩每日為子女安排活動，相信葵青區議員徐曉杰都有呢個體會，事關佢喺Facebook上載囝囝Jason首日返學嘅合照，更講明開始唔鍾意掛三號風波，擺明唔想出現停課令到囝囝要留喺屋企喇！
聞求救仍狠心離開
徐曉杰又講到，送囝囝返學時聽到佢求救，但依舊狠心地一支箭走開，又話希望囝囝咪似佢細個時，趁老師唔留意跑去五百米外嘅地鐵站搵媽媽喎。佢呢個例子聽落真係夠晒經典，相信好難有人超越到嘞！
（互聯網）