政情：將晤業界怕捱打 黃錦星反客為主
近日政府好興講同社會各界對話，而查實立法會建築、測量、都市規劃及園境界議員謝偉銓（Tony）早排搞咗個「與司局長對話」嘅活動，安排業界同政府官員會面，嚟緊會喺下月四日見環境局局長黃錦星，但唔知係咪因為近期政府被人鬧得多，黃錦星早兩日率先喺Facebook問業界對該局各政策有乜想講，佢反客為主想主導會面嘅議題，唔通怕捱打？
據知Tony安排活動時，原意係開放對話內容，唔會限制業界喺會面上講啲乜，雖然Tony早前提過希望業界盡量講番同政策局相關嘅內容，但如果講其他議題都冇話唔得。
率先帶出議題 反應麻麻
唔知係咪黃錦星怕問到其他議題會口啞啞，所以率先帶出上網電價、組裝合成建築法、偏遠鄉郊保育等屬於佢範疇嘅議題，主動問業界對呢啲議題有乜想講？不過睇落就冇乜業界人士回覆，到底佢咁早講定有冇效，可能都要會面時先知喇！