中環出更：傳唔返工無貢獻 葉劉狠炒容海恩老公
政治上嘅離離合合見怪不怪，好似新民黨主席兼匯賢智庫主席葉劉淑儀同匯賢智庫政策顧問袁彌昌，原本二人關係密切，葉劉亦曾多次盛讚袁，袁亦娶咗新民黨立法會議員容海恩（Eunice），但原來葉劉喺本月初已解僱咗袁，但袁就話係雙方終止合作關係。
「離開就離開 唔好成日唱衰人」
近日有傳係葉劉炒咗袁，批評佢成日唔返工、無貢獻，搵唔到大學合作做國民身份認同嘅研究，仲叫佢「離開就離開，唔好成日唱衰人」。
袁回覆時話喺月初同葉劉坐低傾過，覺得既然依家停晒啲研究，自己都唔想賴死喺度，不如終止合作，以一個月通知，下個月正式離職，形容傾談過程和平。佢透露，智庫近來做唔到研究，係因為有關青少年國民身份認同嘅研究，本來想向創新辦申請經費，但批唔到；另一個同中山大學合作嘅研究，就因為近日修例事件，對方唔想同香港合作。佢又話自己寫文章只係對近日事件評論意見，一向都係對事不對人，完全無意唱衰人。
但葉劉就話係自己解僱袁，畀咗一個月通知期，唔想多講此事，因為唔想太傷害對方。佢又話受修例事件影響，智庫研究工作停頓，過咗呢件事後，會重新做研究。
Eunice就話難以評論兩人嘅事，最緊要係工作開心。一個係黨主席，一個係老公，呢場風波會唔會搞到佢退黨o架？佢就話唔會，都係小風波啫，會睇住黨嘅發展，積極幫手咁話。
卓妮