中環出更：賣旗改變怕醜仔 湯振傑：學懂食檸檬
落咗幾日雨，尋日終於出太陽。保良局嘅核心成員親自落場同學生拍住上一齊賣旗，烈日當空出晒汗都冇有怕。總理湯振傑話發覺男仔喺賣旗方面比較怕醜，鼓勵男同學要主動啲，好好練吓畀人請食檸檬喎。
總理顧東華同卓妮講，佢細個讀男校，分人比較怕醜同被動。佢賣過一次旗，已經唔記得幫邊間機構，但記得同另一個都係怕醜仔嘅同學喺銅鑼灣賣旗，兩個怕醜仔唔敢主動叫人買旗，所以當日成績麻麻，但見到女同學收穫就好好多。原來湯振傑都係讀男校，中學就讀香港華仁書院，佢話男仔真係怕醜啲，女仔喺呢方面在行好多，所以佢尋日都要拍番個女同學一齊賣旗喎。佢話賣旗係一個好好訓練食檸檬嘅經驗，畀同學接觸唔同嘅人，學識面對唔順暢，仲可以練吓公開演講添！
另一位總理廖偉芬細個未賣過旗，但因為平時搭車會經過跑馬地，所以經常見到保良局賣旗，在場有好多小朋友，成個氣氛都好溫馨。佢本身開連鎖咖啡店，佢嘅咖啡店尋日會每張單都捐十蚊畀保良局，支持賣旗日，佢話同事及顧客都好開心喎。原來今年賣旗仲加入咗新玩法，只要市民上保良局嘅Facebook分享自己嘅賣旗日故事，保良局董事會成員就會為每個故事額外捐二百八十蚊。
要女兒搭巴士 馬清楠唔縱壞
保良局主席馬清楠尋日都有拍住學生賣旗，佢話兩個女以前讀中小學時都有去賣旗，而佢從來都無縱壞兩個女，都要佢哋搭巴士、小巴。講到培育下一代，佢話保良局依家積極搞緊兒童發展中心，幫一啲有特殊學習需要，例如有自閉症同讀寫障礙嘅小朋友，希望提供支援畀佢哋，等佢哋可以融入主流學校。
卓妮