政情：李國麟離開公大 自製散水餅
快樂嘅時光過得特別快，又係時候講拜拜。身兼香港公開大學護理及健康學院院長嘅立法會衞生服務界議員李國麟（Joseph），前日就喺公大嘅飯堂食「最後晚餐」。咪講到咁傷感喇！佢尋日仲喺「名師」指導下，自製咗曲奇餅，今日就返公大派散水餅。
食埋最後晚餐
Joseph嘅「最後晚餐」係栗子炆雞，有湯、有飯兼有嘢飲。佢話喺嗰度食咗廿幾年，同飯堂職員好熟，咁啱嗰日做得夜咗，咪喺飯堂食埋飯，因為有職員價，餐飯只係三十幾蚊啫！其實聽日先係佢嘅Last Day，尋日佢就喺「名師」指導下，親手趕製咗幾款曲奇餅，包括無花果味、椰絲同榛子味，仲有芝麻脆添，今日就會拎返公大送畀啲教職員，當係散水餅，而佢亦嗌咗到會，到時同大家擦餐飽兼Say Goodbye。
雖然係離開公大，但Joseph未必可以全身而退，事關校方亦已開聲叫佢日後有時間就返嚟教吓書，仲計劃頒個榮休教授銜畀佢，話晒係佢喺公大一手創立護理系嘅，所以佢話只要一吹雞，就即刻返嚟幫拖。