中環出更：畀人鬧完照攪局 漢奸黎再密會李漢奸高達
反修訂《逃犯條例》風波持續不斷，亂局至今仲未平息，壹傳媒黎智英（漢奸黎）近日被內地官媒指，與疑為亂港幕後黑手嘅美國國家民主基金會（National Endowment for Democracy，NED）關係密切，又被批評與美國高官會面，遭國務院港澳辦警告「玩火者必自焚」。呢頭被人鬧完，漢奸黎嗰頭又與同屬「搞事四人幫」、有「李漢奸」之稱嘅民主黨（白鴿黨）創黨主席李柱銘等老嫩鴿喺何文田寓所，再度密會攪局，係七日內第二次。唔通又想諗計喺反修例事件搞亂檔？
七日內第二次 正值遊行前夕
漢奸黎、李漢奸、違法佔領行動案（佔中案）被判囚八個月獲緩刑兩年嘅前主席李永達（高達）同外號「AV仁」嘅前主席何俊仁，四人繼八月三日喺中環一所意大利餐廳密會後，前晚又喺漢奸黎寓所再度密會，今次仲有白鴿黨立法會議員林卓廷。
歷三句鐘 AV仁及林卓廷亦參與
前日下午約五時五十分，漢奸黎嘅七人車載住李漢奸、高達、AV仁同林卓廷抵達漢奸黎位於何文田嘅寓所。眾人密會約三個小時後，至晚上近九時，漢奸黎嘅七人車就接載李漢奸、高達、AV仁同林卓廷離去，幾分鐘後，高達同林卓廷就喺旺角警署落車，七人車繼而送李漢奸同AV仁離開。林卓廷離開時，右手仍有護托包住，未知傷勢係咪同近日喺元朗遇襲中受傷有關。
被指係佔中「幕後黑手」同「金主」嘅漢奸黎，近月同民主派就反修訂《逃犯條例》大合奏，喺多次反修例遊行中，漢奸黎更排喺隊頭，又對遊行隊伍指指點點，扮晒總指揮咁，而近日反修例示威衝擊不斷升級，次數變得頻密，咁啱示威者用嘅武力程度亦都持續上升，情況一次比一次混亂。咁啱尋日分別喺港島東同深水埗再發起反修例遊行，漢奸黎喺遊行前夕同咁多白鴿黨成員再攪局，唔知係咪又想諗計搞亂檔呢？
卓妮