滂沱夜雨唔睇路 司機越線險釀禍
【本報訊】滂沱大雨，揸車亦要特別小心。近日網上流傳一段車Cam片，一名私家車司機疑「冇睇路」，突然橫越對行線轉彎，險撞迎面而至車輛，幸對行車司機反應快，及時急煞，避過一場意外。
對頭車主醒目扭軚
事發在上周四晚上近十時，地點在屯門青山公路青山灣段。事主在社交平台群組上載該段車Cam片。從片中所見，當時天氣惡劣，傾盆大雨，雷電交加。事主見交通燈亮起綠燈，於是繼續往前駛。惟駛近路口時，對行線一輛紅色私家車突然轉右，迎面而來。千鈞一髮之際，事主即時扭軚閃避，避過碰撞。事主事後在貼文中批評紅車司機：「天雨路滑，可唔可以望多下先出車。」
有網民直言看過片段後，「個心都離一離。」亦有人大讚事主「好技術」、「反應好快」、「大師傅」。有網民則揶揄紅車司機：「趕住去食糖水」、「咁揸車法，今日唔撞都聽日撞啦！」