政情：漫畫迷吼準心頭好 陳學鋒出手買成套
唔同年代都有唔同嘅經典漫畫，好多漫畫迷都會買心頭好返屋企o架！好似中西區區議會副主席陳學鋒原來都係漫畫迷，佢早排喺社交網站話喺書展嘅戰利品係一套《火鳳燎原》，仲話終於出手，成日驚爛尾添！真係講出唔少漫畫迷嘅心聲呀！
以前驚爛尾 睇咗少少冇買
陳學鋒回覆時話，其實佢好鍾意睇漫畫，一開始已經有睇《火鳳燎原》，睇到大約十幾期就斷咗冇追落去，因為過往太多漫畫爛尾，笑指有啲漫畫好似同漫畫家「鬥長命」咁，當時好驚《火鳳燎原》都會爛尾，所以睇咗少少就一直都唔敢買，後來見出到咁上下，似乎都OK唔會爛，先入手買咋，仲睇準書展有特價，成套都係買咗千幾蚊。
佢話好少買成套漫畫，因為屋企真係冇咁多位存放，都要揀啲好精彩嘅先買，又話依家睇漫畫同細個睇好唔同，細個可以去租漫畫睇，睇到覺得嗰套好先買嚟收藏，依家就冇晒漫畫店，冇得慢慢睇到啱先買啦！