政情：推動舊衣回收 楊哲安推車仔幫手

楊指衣物回收都有季節性

Jeremy解釋，其實當時只有三籠衫，平時都係相關機構自行推上大貨車，但當日撞正落雨，為咗快啲搞掂就幫手一齊推，仲話啲籠其實有晒轆，睇落好大件但一啲都唔難推咁話。

佢話每年會搞至少兩次舊衣物回收，事關衣物回收都有季節性，例如農曆新年會收到舊保暖衣物，暑假就收到舊校服，所以趁呢啲時間做較合適。

佢作為山頂區區議員，會唔會回收到好多名牌衫？佢話確實有部分衣物係普通市民會覺得係較為值錢嘅牌子，但市民捐得出嚟嘅都以實用性為主，例如合唔合身、保唔保到暖等，就冇見過設計誇張、有如時裝展先會着嘅衫，所以相信同其他區衣物回收都一樣。