政情：梁美芬議辦遭破壞 斥be water變waste water
修訂《逃犯條例》風波蔓延至全港各區，建制派議員辦事處亦成為示威者嘅攻擊目標，好似立法會議員梁美芬嘅石硤尾辦事處，就喺前日嘅示威中遭殃，搞到梁要同職員一齊拎起水喉、地拖大搞清潔，甚至斥示威者搞到佢要「use water」（用水）同「waste water」（嘥水）！
門牌門鎖被噴漆
被示威者破壞後，議辦門牌上嘅「梁美芬」三字，被示威者噴上黑色噴漆，只係得番「立法會議員辦事處」八字，門鎖亦被噴漆。佢尋日喺Facebook形容石硤尾辦事處係屬於「石硤尾的街坊」，唔止屬於佢一個，事關平時有好多街坊鍾意喺度閒談傾偈，結果今次辦事處被破壞，受影響嘅唔止係佢本人，仲有經常喺佢辦事處流連嘅街坊，仲話其中一個年屆九十八歲嘅老街坊因為咁而嚇親添啊！
佢仲話示威者成日都話要「be water」（像水一般），結果今次真係要「use water」同「waste water」，暗批示威者搞破壞，搞到佢要浪費水去做清潔咁話。