政情：香港大亂 劉慧卿嘲自由黨變遊埠黨
香港立立亂，自由黨都有暗湧，早排幾個元老出手向黨主席張宇人「逼宮」，促辭行政會議成員一職。自由黨黨魁鍾國斌（Felix）尋日接受立法會前議員劉慧卿（卿姐）訪問，卿姐追問個黨搞成點，有無下文？Felix就話班元老去晒遊埠，卿姐就嘲諷話香港咁亂，依家自由黨變遊埠黨啊？
係咪遊埠黨呢？Felix笑而不語，但佢就話呢兩個月香港變咗另一個世界咁，不論左中右都嘆氣，情況仲衰過沙士，因為中美貿易戰令出口業生意差，依家隔日就有衝突，嚇到遊客唔敢嚟，飲食零售受拖累，簡直就係瓣瓣唔掂，強調今年經濟一定衰退喎。
卿姐就反問，咁立法會仲可以做乜？係咪已經廢咗？Felix就話明白市民期望立法會不分黨派做啲嘢，例如社會共識要成立獨立調查委員會，但查乜嘢範圍無共識。卿姐就想當年話八黨聯盟都係自由黨做喇，叫Felix做嘢，Felix就話唔好咁大期望，首先要有人聽佢講，激到卿姐話：「試吓先啦！細佬！」最後Felix承諾如果大家願意坐低傾，佢願意去協調喎。