中環出更：譴責警方濫用暴力阻採訪 記者筆敲頭盔抗議
反對修訂《逃犯條例》嘅示威次數愈嚟愈頻密，記者無懼危險採訪，雖然警方高層經常稱呼發揮第四權嘅記者做「記者朋友」，但係唔少正常採訪，都畀「阿sir」喝罵話妨礙執法，小則推撞，大則中彈、中煙同硬食警棍。
警方尋日舉行四點例行記者會時，多名記者把握機會，以平時採訪示威衝突嘅裝束出席，包括身穿反光衣，而喺警方代表進場時抗議，用筆敲頭盔，表達警方向記者使用暴力嘅不滿。
用大燈照眼 肆意拘捕
期間，由記者代表宣讀宣言，表示過去幾星期，前線記者履行職務期間，遭警方用燈照眼同鏡頭、用盾牌推撞、用粗口侮辱、甚至肆意拘捕，強烈譴責警方濫用武力，阻礙記者採訪，要求警方持守專業精神、維護新聞自由同尊重記者嘅採訪權利。
警察公共關係科總警司謝振中見一班記者咁嬲，喺發言前都不得不回應幾句，話聽到大家嘅聲音，承諾必定會認真改善，將有關意見帶畀前線警員。希望警方唔好意見接受，態度照舊啦！
卓妮