中環出更：網球場地有限 莫君逸促設上蓋增使用率
為咗向普羅大眾推廣網球運動，香港網球總會尋日宣布再次得到賽馬會支持，撥款資助為期三年嘅「樂動網球計劃」，令到小學生、殘疾人士以至老友記，都可以喺教練免費指導之下，掌握打網球嘅技巧。總會會長莫君逸就話網球場地有限，希望政府可以喺網球場加上蓋，增加使用率。
莫君逸話對比其他周邊國家，香港嘅網球場地的確較少，喺康文署轄下嘅公眾場地以外，好多網球場都設喺私人會所之內，加上網球教練嘅收費絕不便宜，雖然總會可提供教練同相關網球用品，但場地方面就真係要諗吓辦法。
佢又話外界有種錯覺，以為打網球必定喺露天進行，其實室內或有蓋嘅場地既可進行網球運動，亦適合香港潮濕多雨嘅環境。佢話上星期總會舉辦為期七日嘅青少年國際賽，結果就有四日落雨，若果政府能夠於現有嘅公眾網球場地增設上蓋，使用率就可大幅提升。佢話加設上蓋所費有限，希望政府於資源分配上能有所考慮，以便網球運動能進一步融入社區咁話。
孫秉樞以前每朝打完網球先返工
講起打網球，綽號「鐘錶大王」嘅孫秉樞，四十幾年前就已經係網球嘅愛好者。佢話當時任職洋行高層，嫌久坐辦公室不利健康，於是佢每日清早都去香港鄉村俱樂部，同教練及朋友打完網球先至返工。佢憶起初時學打網球，教練要收取每小時二百五十蚊，喺七十年代嘅物價水平嚟講可謂所費不菲，依家有計劃將網球運動普及至社會各階層，佢認為係好事。
百仁基金副主席余偉傑喺小學時代就同家姐一齊打網球，後來負笈英倫，埋首課本以致球拍封塵。佢話唔清楚香港嘅網球場數量，但佢話有桌上網球之稱嘅乒乓球，所佔嘅活動空間要較網球少得多，或許因此之故，網球喺香港嘅普及程度，就唔及得乒乓球咁高。
卓妮