政情：岑子杰投訴蔣麗芸歧視 平機會稱無法跟進
立法會議員蔣麗芸（Ann）言論一向惹火，好似前排喺社交網絡上傳有關民陣召集人岑子杰性取向嘅短片，結果換來岑子杰聯同首位出櫃立法會議員陳志全（慢必）向平機會投訴。而平機會尋日就作出回覆，指無法進一步跟進，咁阿Ann係咪可以鬆一口氣呢？
岑子杰等人喺上周五作出投訴，並要求平機會五日內回覆，否則唔排除發起社區遊行，當日阿Ann已經喺網上反駁，強調從無歧視同性戀，又指岑已出櫃就應坦然面對，咪動不動就怨天怨地話遭攻擊喎。
上傳短片不違法卻不恰當
而平機會尋日回覆傳媒查詢，指收到若干查詢同投訴，但事件都唔屬於現行四條反歧視條例所涵蓋範圍，所以未能作進一步跟進，亦未能按現有法例機制去處理相關投訴。不過，平機會都話該短片雖不違法，但都唔恰當，任何人表達意見時應以事論事，而非用無關議題嘅考慮如性傾向去作為論述。睇嚟平機會跟進唔到，都認為阿Ann有唔啱喎。