政情：容海恩又有喜明年一月預產期

Eunice笑指，可能人哋以為佢未修身，所以唔覺佢有咗，依家都唔着得緊身衫住，而今次有咗，同上次一樣咁覺得唔舒服。佢話尋日正正係大女兒袁昌蔚半歲生日，昌蔚已戒夜奶，但第二個小朋友明年初出世，即係又要再餵夜奶，自己又會冇得瞓嘞！聽落做媽媽真係辛苦呀！

佢又話預計會開刀生第二個小朋友。咁快又有喜，真係挑戰嚟，但做得議員都冇得坐月(口架)啦，惟有希望復原得快啲，生完就快啲出嚟工作啦。至於又再有喜，會唔會影響佢來年出任立法會嘅委員會正副主席呢？佢就話要同新民黨主席葉劉淑儀傾吓先，亦要同其他黨協調吓先喎。