政情：民政局疑有人罷工 劉江華未答就鬆
香港潮屬社團總會今年舉辦嘅盂蘭文化節得到民政事務總署嘅贊助，尋日嘅新聞發布會固之然要邀請民政事務局局長劉江華到場做嘉賓講兩句啦，但唔知點解講講吓，劉局長突然避走咗，連原本應承出席嘅午宴都無去，唔通怕咗記者追問民政事務局疑有職員罷工，而自己先行「罷工」？
劉江華尋日上台致詞時讚揚總會對宣傳盂蘭文化功不可沒，又祝願新一年盂蘭文化節圓滿成功，又希望各位能盡興而歸。但主辦單位同傳媒就似乎未能盡興而歸，皆因發布會結束後，佢原答應會同一眾總會理事及會員共進午宴，但未知佢係咪見到有傳媒在場，擔心被質問早前民政事務局有職員寫有「因政府無能而罷工」一事，喺致詞完後就急急腳走人。
主人家胡炎松一頭霧水
連香港潮屬社團總會盂蘭勝會保育工作委員會副主任胡炎松都一頭霧水，話：「係囉，走得咁突然嘅？」其實又使乜驚記者追訪啊，醜婦終須見家翁，佢終有一日要回應市民的疑問，避唔過o架！
事後新聞秘書引述局長劉江華嘅解釋，話當時唔係避走，而係有好急同好緊要嘅公務要處理，所以要先行離開，而事後亦有向總會解釋，並向對方講唔好意思。