政情：怕被踩場 元朗區會走為上着
日前元朗區陷入真空狀態，任由一班身穿白衫嘅人通街打人，激起全城怒憤。元朗區議會尋日原定有兩個小組委員會要開會，但早上民政處職員先向到場採訪傳媒話，所有會議已經取消，錄音師都走埋喎。唔通班議員驚畀人「踩場」搗亂，提早使出三十六計，走為上計？
鄭泳舜替港鐵擋駕
元朗暴力事件仲燒到出九龍區，皆因深水埗交通事務委員會尋日都開會，其中有港鐵代表出席會議，多名民主派議員就向港鐵查詢元朗當晚廝殺列車嘅事，要求交代點解唔開車以及報案詳情等。不過，據現場議員引述，委員會主席兼立法會議員鄭泳舜就出口術幫手「擋駕」，話唔關議程事，港鐵代表可以唔回應。
另外，同一個會議上建制派議員發表完意見，講晒訴求之後就陸續離開，到其他事項審議無障礙交通設施非常設工作小組約兩萬元撥款申請時，因人數不足而流會。工作小組主席何啟明就鬧爆建制派口口聲聲做民生，到撥款搞民生就走咗去，有無搞錯喎。