政情：葉劉急獻策田北辰寸爆 失民心者派$8000？

每年暑期各政黨都開始就十月份出台嘅施政報告提建議，仲會約見特首傾吓計，到年低時見財政司司長就明年初嘅預算案畀意見。尋日新民黨見波叔，大家以為可能係傾施政報告喇，但葉劉經多番追問吓，強調係自己主動約波叔，話預見到今年經濟衰退嚴重，再加上近期嘅衝突影響，所以要早啲畀意見喎。

唔擔心派錢會買抗爭物資

新民黨合共提出七項建議，首當其衝、至為重要就係向十八歲以上嘅永久居民發放八千蚊現金津貼；取消卓越獎學金計劃的限額；增加香港應用科技研究院資助額至三億港元；喺多項支援中小微企計劃中，減費降息一年；寬免短期租約的兩成五租金，為期半年；豁免營業車輛一年內驗車費；豁免旅行社、酒店、旅館、酒吧、食肆及小販一年牌費。

葉劉不斷強調，有預預測指今年經濟增長率可能得百分之一，加埋社會動盪有衝突，中美貿易談判未明朗，經濟下行風險大，種種問題早已影響緊基層生活，形容人人有錢分就實際啲、開心啲，話對市民實有幫助喎。咁擔唔擔心有人用錢買抗爭物資？佢就話唔覺得個個都會買頭盔，而且就算真係派錢都係明年嘅事，只係提早叫波叔考慮吓要唔要做。

田笑言網民醒過行會成員

有錢派嘅消息迅間引起民間哄動，有網民就搵到田北辰幾年前同葉劉見高官嘅相，田北辰就立即喺社交網站發貼，澄清自己兩年前已退咗黨，依家所屬政黨係實政圓桌。佢仲將網民留言截圖話新民黨係想收買人心，笑言網民都醒過身為行會成員嘅葉劉，而且如果大家收到錢，相信會派番畀政府，叫當局成立獨立調查委員會好過喎，明寸葉劉嘅建議唔掂幫倒忙。

相信市民唔會抗拒政府派錢，之但係以波叔撳住荷包做守財奴，市民鬧爆佢先肯透過關愛共享計劃派四千蚊，仲要派到天怒人怨，試問有冇咁易畀葉劉撬得開政府金庫呀？