中環出更：狄志遠黃成智 擺和頭酒泯恩仇？
狄志遠同黃成智喺一五年九月退出民主黨（白鴿黨）後，另起爐灶創立政黨「新思維」，但成智因不獲黨內支持參選立法會社會福利功能界別，退黨參選，其後成智透過新思維嘅傳媒群組發放個人社企消息，更被狄志遠「秒速」踢出群組，令呢對沙煲兄弟不咬弦浮面，然而近日佢哋又同枱食飯喎，唔通擺和頭酒？
話說狄志遠日前喺Facebook上載咗一張相，係佢同成智，仲有李立航同陳漢林同枱食飯。李立航曾經做過沙田區議員，後來亦退出白鴿黨，之後佢就去咗北區做地區服務，而陳漢林亦曾喺北區服務過。
狄：細說當年 仍然一番滋味
相中所見，滿枱佳餚，佢哋一邊食，一邊嗒茅台，大家都滿臉笑容，睇嚟食得好開心。原來呢餐係上海家庭菜，由狄志遠炮製，而陳漢林就煮雪菜火鴨絲伊麵。狄志遠仲貼文話「當年，大家都在北區服務，現在都從過往崗位退下來，細說當年，仍然一番滋味。」
問到張相好似擺和頭酒咁，狄志遠話當然唔係喇，仲話佢哋經常聚埋嘅。再追問有冇再諗住再戰立法會，佢話應該唔會嘞！見新思維冇乜聲氣，咁有冇新部署呢？佢就話退休嘞，冇部署。政治一日都嫌長，狄志遠同成智係咪全身而退，大家拭目以待嘞！
卓妮