政情：「輪椅劍后」接林凱章棒 入安老事務委員會
政府委任公職有不成文嘅「六六規定」，但唔少公職都會委任足足六年，但政府尋日公布安老事務委員會成員，身兼行政會議成員、立法會議員林健鋒嘅兒子林凱章即將離任，即係林凱章只係做咗四年啫！而接替佢嘅人選，就係有「輪椅劍后」之稱嘅香港輪椅劍擊代表隊成員余翠怡，任期喺七月三十日起生效。余翠怡同時亦係平等機會委員會委員同體育委員會成員。
所謂「六六規定」，即同一人唔可以同時擔任超過六項公職，或出任某公職超過六年，而近年鬧人才荒，令到呢個規定不時被打破，有啲人會擔任部分公職六年以上。
林話嚟緊或有新動向
林凱章喺二○一五年起擔任安老事務委員會成員，按道理最少可以做多一屆，依家只係做咗四年就離任。林凱章就話主要因為時間安排，唔一定做晒六年，呢個都係正常調動，仲透露嚟緊有機會有新動向，又回顧喺安老事務委員會學到好多嘢，好多謝主席同其他委員咁話。