政情：蔣麗芸涉歧視 慢必岑子杰平機會投訴
立法會「出櫃」議員陳志全（慢必）同彩虹行動執行幹事岑子杰，尋日到平機會投訴民建聯議員蔣麗芸（Ann），指阿Ann涉嫌歧視同性戀，又指佢喺社交網站上傳一條關於「新任民陣召集人岑子杰，刻意隱瞞性傾向」嘅影片，呼籲網民廣傳。岑子杰等人希望平機會主席朱敏健喺五日限期內回應，否則唔排除發起社區遊行。而阿Ann晚上喺Facebook貼文反駁，強調從來唔歧視同性戀。
Ann：你已出櫃 就要坦然面對
岑子杰、慢必及同志團體拉起自製嘅同志連儂牆橫額，到平機會遞交聯署信，但朱敏健外出開會，由職員代為接信。岑認為性傾向唔應該加入政治議題嘅討論中，指阿Ann此舉會令參政人士受到不必要嘅攻擊。
阿Ann就喺Facebook反駁岑，話「就一句『重要消息，請廣傳』你就認為是攻擊你，這只證明儘管已出櫃的你，還是未過自己心理關口！」佢強調從來唔歧視同性戀，當知道認識數十年嘅老友鄧達智結婚時，佢送上祝福，又話：「岑子杰，既然你已出櫃，就要坦然面對，別動不動就怨天怨地話有人攻擊你，懂嗎！」
另外，早前舉行嘅九龍大遊行期間，有警員向示威者呼喝「隻揪呀！」慢必曾去信警務處處長盧偉聰，表示代市民應約同嗰位警員「完全合法的情況下『隻揪』」，而慢必尋日收到投訴警察課嘅回信，指已經將佢嘅投訴記錄在案，慢必就話「我約你隻揪，唔係投訴呀！」