中環出更：美駐港總領事履新 拍片公開同志身份
美國駐港澳前總領事唐偉康（Kurt Tong）喺上月已卸任，新任總領事為史墨客（Hanscom Smith），已於本月履新，佢甫上任即拍了一段長約一分鐘的短片，向港澳市民打招呼，更喺片中公開其同志身份，分享佢與同性伴侶呂英宗嘅合照，並指二人均喜歡電影、旅遊同美食，仲話港澳係能夠滿足佢哋呢三項愛好嘅絕佳之地添！
史墨客本身亦懂中文，而喺片中就以「唔鹹唔淡」嘅廣東話「你好」、「遲啲見」向市民打招呼，指自己喺一九九六年首次踏足亞洲，從此就愛上香港同澳門兩個城市，及後亦多次到訪，對兩地人嘅熱情、幹勁同創意印象深刻，感到親切。
史墨客又話約喺三十年前成為外交官，大部分外交生涯都喺亞洲度過，讚揚港澳充滿活力同機遇，能夠吸引世界各地嘅人。
有豐富對華經驗
其實，史墨客擁有豐富嘅對華經驗，過往曾喺上海擔任總領事，亦曾喺美國國務院任職中國及蒙古事務處處長，亦曾喺多個美國駐外使領館工作，當中包括喀麥隆、丹麥、柬埔寨、泰國同阿富汗。
卓妮