「明日大嶼」填海計劃極具爭議，但政府唔理社會上強烈要求擱置嘅訴求，更率先就東大嶼填海前期研究工作申請撥款，發展局局長黃偉綸尋日仲話政府唔會輕易放棄計劃。其實財委會塞晒車，為免其他民生撥款被拖死，早就將東大嶼前期研究工作嘅撥款申請放到最後位置，獲通過嘅機會微乎其微，黃偉綸依家咁講根本就係死雞撐飯蓋，仲有受到嚴重破壞嘅立法會都唔知十月能否復會，佢仲預料年底可討論相關申請，似乎太自我感覺良好嘞！
