政情：李國麟完成最後一課 笑言第一年有暑假放
身兼香港公開大學護理及健康學院院長嘅立法會衞生服務界議員李國麟（Joseph），尋日喺社交網站上載咗一份有關香港公共衞生政策嘅PowerPoint（投影片簡報）照片，過往曾多次批評政府醫療政策嘅佢，唔通又有政府政策令佢不滿，所以要向政府「發炮」﹖
下月卸任公大院長一職
其實Joseph並唔係要向政府「開火」，只係尋日係佢喺公大最後一日上堂，所以先上載照片，特此紀念佢最後嘅一堂課啫！不過，Joseph下個月先至卸任院長一職，所以暫時都仲要返公大工作，佢仲好搞笑咁話︰「我仲有糧出o架。」
問到講完最後一堂課有乜嘢感受？會唔會擔心日後教書癮起﹖點知Joseph就笑笑口話︰「我第一年有暑假放喇！」原來往年嘅暑假佢都要忙於學校收生、開學禮、暑期課程等事宜，通常都要到九月先得閒，所以都唔得閒放暑假，今年就終於唔使咁困身喇！不過Joseph都話，始終教咗廿幾年書，點都有唔捨得嘅，但佢不嬲都有喺唔同院校講課，話日後如果有啲課堂需要佢幫手，佢都可以教番幾個鐘咁話。