政情：劉鎮漢月底離任 黃進達姚思榮辦餞別宴
旅遊發展局（旅發局）總幹事劉鎮漢本月底將離任，立法會旅遊界議員姚思榮近日喺社交網站貼出相片，包括有旅遊業議會（旅議會）主席黃進達（Jason）等旅遊業界幫劉鎮漢舉行餞別晚宴。Jason話當晚係旅議會理事會搞嘅，佢哋一向同旅發局合作無間，大家同劉鎮漢相識多年，所以都特別聚一聚，搵埋姚思榮一齊歡送佢咁話。
黃讚劉好落力推動旅業
Jason話同劉鎮漢相識超過十年，大讚對方一直好落力推動旅遊業，喺唔少海外推廣嘅活動都有一齊參與，最難忘係每年單車節，就算劉鎮漢單車技術麻麻，喺彎位會炒車仍瞓身參與，幾辛苦都捱到尾，真係好欣賞佢為業界咁落力。睇嚟佢都唔多捨得劉鎮漢嘞！
依家仲未知道邊個會接任旅發局總幹事一職，Jason話預計繼任人都需要時間適應，因為始終旅發局牽涉嘅事情都相當多咁話。