中環出更：張超雄參與反修例 被慈善團體「搣柴」
反對修訂《逃犯條例》嘅遊行示威一浪接一浪，更演變為暴力衝突。作為民主派一員、一直反對修例嘅工黨立法會議員張超雄，就因為參與反修例活動被民間慈善團體「搣柴」。香港註冊慈善團體「腦友坊」發出通告，指過去幾個月發生一連串反修例示威活動，張亦有參與其中，該會對張嘅言行深表遺憾，故宣布由即日開始，褫奪張於「腦友坊」嘅榮譽顧問資格。
即日褫奪榮譽顧問資格
「腦友坊」尋日喺社交網站發出「榮譽顧問除名通告」，指過去幾個月發生一連串反對《逃犯條例》修訂嘅示威活動，消息令人不安，張超雄亦有參與其中，亦發表咗對今次事件嘅睇法，同作出相應行動，該會上下委員對張喺今次事件嘅一連串行為同言論深表遺憾。因此，該會宣布褫奪張作為該會榮譽顧問嘅資格，即日生效。
根據該會網站資料，該會嘅目標係為貧困人士提供廉價上門電腦維修服務，令巿民明白使用合法電腦正版軟件嘅重要性。本報已致電張超雄查詢，惟張至截稿仍未有回覆。
卓妮